My First Project ;

‘

آولاً ، متأسفة على الإنقطــاع ، بس مع الاسف من أول السنه وانا ما عندي وقت اكتب

عموماً !
Finally, I Finished my English project !
طبعاً بما اني مقررات .. مطلوب منّا كل ترم مشاريع .. بس مو شرط كل المواد ،
على حسب المعلمات ..
فـ معلمة الانجليزي طلبت من كل قروب بنـات مشروع !
بالبداية الاستاذة وزعت القروبات .. كانت تبغى 5 رئيسات ، عشان تصير كل مجموعة فيها 6 طالبات ..
لكن مع الاسف ما تطوعوا للرئاسة إلا 4 طالبات .. والاستاذة قالت لي صيري معهم ، بس انا ما حبيت !
المهمـ .. اليوم اللي بعده فجأه الرئيسة الرابعة قررت انها ما تبي .. وراحت مع قروب صديقتها ..
وتركت الاستاذة متوهقه تدور بنت تمسك القروب الرابع !
وكل البنات ما يبون .. وآخر شي بعد محاولات من البنات ، قبلت مع الاسف ..
عاد انا ما كان ودّي اقبل لأني ما اشوف نفسي شخصية قيادية وممكن تمسك مجموعة من البنات ><"

عموماً .. بنات الفصل ، كل بنت تختار مع مين تبي ..
فـ بالاساس كان مفروض كل رئيسة معاها 6 طالبات ..
وانا خلاص وقتها كنت مكتفية .. فجأه تجي حصه الانجليزي ويطلع في قروب رئيسته بس معها 4 بنات !
بحجة انهم صديقات فـ يمديهم يتجمعون وباقي البنات ما يقدرون يجون معهم -___-
طبعاً انا تنرفزت من حركتهم بس طنشت .. لكن المصيبة فجأه الاستاذة عادي خلتهم ..
وضافت لي بنتين ! .. انا انصصدمت ، يعني بيصير معي 8 بنات ! .. شسوي فيهم بس =/
طبعاً قروبي أكثر قروب تخيلوا .. وحده ولا عمرها جربت تترأس شي ، صار معها أكبر قروب ><"

المهم حبيت نشتغل من البداية .. فـ بديت افكر بأفكار للبروجكت .. والاستاذه كانت محدده لكل فصل موضوع يسوون عنه ،
موضوعنا كان عن [ أناس عظـماء ] ، فـ بالبداية دورنا شخصيات ..
انا طلعت فوق الـ 6 شخصيات .. لكن آخر شي اخترنا [ هيلين كيلر ] ،
< كـاتبة .. لما كانت صغيرة أصيبت بمرض أفقدها اهم حاستين : البصر والسمع .. لكن قدرت تتغلب على إعاقتها ..
وتخرجت من الجامعة وقدرت تتكلم وألفت كتب وكذا .. حبيت شخصيتها لأن حسيتها فعلاً ممكن تكون محفز عظيم للطالبات !
خصوصاً انها فقدت 2 من اهم الحواس .. ومع ذلك نجحت في حياتها ..

فـ بعدها قعدت أبحث عن آفكــار للمشروع ، اقترحوا عليّ فكرتين .. وفعلاً عجبوني كثير
خصوصاً ان القروبات الباقية .. 2 سووا عرض باوربوينت ، وقروب سوا مجلة ..
فـ حبيت فكرتنا تكون غير .. فـ كانت الفكرتين [ لوحة لها + فيلم وثائقي ] ،
اللوحة حبيتها تكون كـ إضافة .. وكان تركيزنا ع الفيلم الوثائقي .. بحيث نسجل اصواتنا فيه وكذا
فـ بالأول بدينا نشتغل ع اللوحة .. وكذا .. وبوقت ما كنّا نشتغل .. قلت لبنت خالتي ع اللي بنسويه ..
واقترحت عليّ اننا نضيف مطويّة للوحة ! .. يعني يكون باللوحة زي صندوق فيه منشورات عن لغة الاشارة ولغة بريل وهكذا ..
مرره عجبتني الفكرة ! .. لأن حلو اننا نعطي البنات شي يفيدهم .. ممكن يحتفظون فيه ..
بس قررت إني اخلي المطوية لآخر شي .. لو بقى لنا وقت يعني ..

المهم اشتغلنا باللوحة نصها تقريباً .. وبعد كذا بدينا نسجل الاصوات ..
التسجيل كان مأساااااااااااة ! .. انا ومع الاسف احب الدقه بشغلي ، فـ النطق لازم يكون صحيح !
فـ عذبت نفسي 3 أيام .. وانا بس اعدل لهم النطق واسجل وحالتي حاله .. لدرجة آخر شي شبه تهاوشت مع وحده
من القهر والله .. 3 أيام على شي بسييط ، بس يلا الحمدلله عدت على خير ..

وبعدين كملنا اللوحة وكل شي ، وهالاسبوع كنت اشتغل على الفيلم ..
والتسليم اصلاً امس ، بس بما ان الابلة غايبه صار اليوم ..
عموماً .. احنا قررنا انو خلاص مافي مطوية لأنو ما في وقت والبنات اللي طلبت منهم يجيبون لي اشياء للمطوية ما جابوا !
انا طنششت وقلت بكيفهم .. وقعدت اشتغل على الفيديو بس ..
فـ تخيلوا يوم الأحد فجأه اشوف قروب جايبين مطوية ..
انصصدمت .. يعني يا رب انها فكرتنا وانا دارية انهم سمعونا .. عموماً طنششت ،
بس يوم الاثنين استوعبت ان حتى القروب الثاني مسويين اوراق صغيره عليها اقتباسات مع حلاو !
فـ يعني يا رب نسوي شي ..

قمت خذت البنت اللي اشتغل معها دايماً ، قلت لها ترا البنات كذا سووا ومدري ايش ..
وكل افكارنا انسسرقت يعني .. وقلت لها إلا إلا بنسوي شي نبهرهم فيه !
قعدنا نفكر بطرق ثانيه لعرض مطوية ، بس مافي .. مافي حركة مميز بجدّ ..
وفجـأه .. طلعت البنت بفكرة ولا آروع ! فـاصل كتاب !
عجبتني الفكرة مرررره .. وفكرنا نحط صورتها فوق ، وتحت مكتوب اقتباس لها ، ومن ورا اسمها !
وقررنا انا اسويه وارسله لها .. وهي تطبعه وتقصه وتوديه المكتبه < لاحظوا الشغل بيصير بيوم وليلة
فـ اشتغلنا وضبطنا .. وآمس الحمدلله كان كل شي جااهز ! ..
وكلمت الاستاذه عشان تخلي عرضنا اليوم .. وصارت الفواصل من آروع ما يكون
< لدرجه الحين مضطره اسوي دفعة ثانيه بما ان الفواصل كلها خلصصت !
< مع اننا سوينا زيااده .. بس الحمدلله ، استاذات الانجليزي طلبوا منا وكذا .. يعني نجح المشروع

صورة اللوحة :

صور الفواصل -سويت المثال بالفوتو ع السريع ، بالواقع آحلى 3>- :

< آخر واحد ع اليسار .. هذا الخلفية ، كانت موحده للكل ..

وربي الحين انا حاسه اني بقمممة الفرح .. أول مشروع لي ، وأول مره اصير رئيسة !
< مع إني كنت رئيسة عصصصبية ;p .. لكن قدرت امسك البنات صح
فـ بجدّ حسيت بفخر .. والاستاذه عجبها كثيير ، والبنات بعد ..
خصوصاً الفيديو وكذا ، بس مع الاسف ما يمديني اعرضه بما انه يتضمن اصواتنا يعني ..
بس الحمدلله .. بكل فخر اقدر اقول اني أنجججزت شي هالترم !

ومن الحين بديت اضبط شغل الترم الجاي ، ما بيكون مشروع ..
بس راح افاجئكم

مع السـلآمة ~

الشيف دلال =P

’

آهلييين ..
كيفكم ؟ .. أخبـآركم ؟!
سوري على المقاطعة الفجائية بس ما كان عندي شي اتفلسف فيه عندكم ..

آحم .. طبعاً هالمدونة المفروض انزلها من اسبوع مدري أكثر ، بس انشغلت شوي واليوم مروقة وجاية اتفلسف عندكم !
أمممـ يوم القرقيعان كنت مقررة أني لازم ابدع شوي وأوريهم ابداعاتي بالطبخ ! < طبعاً آخر شي اقتنعت انه ما في آحلى من الجاهز .. بيليف مي !

المهمـ انو في حلى عندي اياه من آيام الاختبارات ، رحت اتفلسف عند صاحباتي عنه وعطيتهم اللينك حقه وكل شي .. وكل وحده تشوفه تقول سويه وارسليلي < عججز مو طبيعي ..

هذا لينك الحلى [ Pudding Cups ] ..
< شفتوا كيف مخلين مبزره يسوون ويحوسون ! .. صدقوني الشي مو بهالسهوله !
يستهبلون علينا .. حاطين مبزره يشتغلون ويسوون ، وربي حسيت اني خبله لأن المبرزة أحسن مني !!

المهمـ انه بنت عمي -هي مو بنت عمي بنت عمي ، تقرب لي من بعيد بس اسهل خلينا نقول بنت عمي - هي جت عندي من الليل عشان نشتغل ونضبط الوضع وكذا ..
فـ سألتني وش ناوية تسوين ؟ ، قمت اتفلسف عن الحلى وكذا ..
وهي انصدمت لأني مو مجربته من قبل .. وهي عارفة البلاوي اللي ممكن اسويها بأول تجربة لأي طبق !

فـ على الساعه 6 الصباح قالت لي امشي خلينا نروح نجرب على الاقل نسوي واحد أو اثنين عشان نشوف ينفع ولا لأ ..
قلت لها أوكي مو مشكله ، عاد رحنا للمطبخ وخذت اللاب ومتحمسسه اقلب بالموقع واوريها الحماس ..
فـ الحين أول شي بيكون لازم نسوي نذوب الشوكولا .. و آحمـ أنا انسانه ما عمري ذوبت شوكولا من قبل !
وتذكرت بنت خالتي لما كنا بالابتدائي مره ذوبت شوكولا بحمام مائي -آي ثينك كذا اسمه- .. اللي يجي قدر فيه مويه حاره وتحط صحن قزاز فوقه وتذوب الشوكولا على البخار ..
عاد رحت أدور لي شي احط فيه الشوكولا وعججزت وانا ادور .. لأن حاطه ببالي شي ومو قادره القاه ،
وآخر شي بنت عمي اقترحت علي نستخدم [ الجك حق الفيمتو ] مدري وش تسمونه ..
فـ انا بكل ذكاء وافقتها الرأي ، ورحت بكل حمااس حطيت الجك بوسط الموية الحاره ..
وكنت توني جاية بحط الشوكولا فيه إلا فجأة .. [ طكككككك ] !
< انا قعدت اطالع ببنت عمي بكل تنااااحة ، بعدين صرخت علي [ طلعيييييييييه ! ] .. وقتها استوعبت اللي صار وطلعت على طوووول !
والمفاجأة العظمى .. القاعد اللي تحت انفصلت عن الباقي ههههههه ! .. انا عاد وقتها تركت كل شي وقعدت بس اضححححك !
.. عاد لو سمحتوا بلا إهانات ، ماني هبله بس وش عرفني الحرارة مو زينة مع القزاز !

< هذا هو الجك المسكيين .. عاد لا تفضحوني ؛ ترا للحين ماما ما تدري عن اللي صار ..
.. ترا مو انا اللي ماسكته ، انا اللي ماسكة القاعدة ..

×

أيوه المهمـ .. بعد اللي صار ، تعلمنا درس قيم في كيفية تذويب الشوكولا ..
وترا بجد يعني انا مو ذنبي ! هم المفروض حاطيين طريقة تذويب الشوكولا -____- ! ..

المهم بعد كذا خلاص ذوبنا الشوكولا وكل شي .. وجينا متحمسين نبي نغطس البالون بالشوكولا ..
طبعاً راح عن بالنا انو البالون ما يستحمل حرارة ! < أرجع واقول مو ذنبي !
فـ جيت انا متحمسسه ودخلت البالون بالشوكولا بكل ثقه ! .. وبنت عمي شوي وتدخل وجهها بالشوكولا !
وفجأةً .. BOOOOM < انفقعت البالونه بوجه بنت عمي هههههههههههههه !
وصارت بيجامتها كلها شوكولا .. وانا طبعاً بس اضححححك !!

طبعاً طبعاً هنا نتعلم درس قيم آخر .. البالون لا يستحمل الحرارة ، مثله مثل القزاز ..

عاد قعدنا نبرد الشوكولاته ونضبط الوضع وكذا .. و وأخيييراً سوينا آول وحده ،

< شوفوا شوفوا الجمال بس !

×

.. عاد بعد ما استانسنا بالأولى .. قلنا خلينا نسوي 2 مره وحده وكذا ،
وجينا متحمسين سوينا الثانية ، وعاد كان شكلهم يجنن .. اثنين وكيوووت مره !

وشلتهم عشان ادخلهم بالفريزر عشان يجمدون اسرع وكذا ، عاد بسم الله توني جيت بدخلهم للفريزر .. إلا فجأة BOOOOM !
< بوجهي هالمره هههههههه ! .. المشكله اني تنحححت ، وفجأه لفيت على بنت عمي أبي استوعب شصار ! .. عاد الدووبا تقول تعابير وجهك زي هذا [ ] ! < والله من التحطيييم اللي جاني !

بس ابشركم البرودة ما تأثر على البالون .. مدري ليش انفقعت بس مو من البرودة ،

المهمـ آخر شي دخلنا وحده وصارت ولله الحمد ..

< على اليسار البالونتين قبل لا ادخلهم .. اليمين آآآآآخخ بس !
< آحم .. السجاير حقت بابا واللهي ، بريئـآات ترانا ..

< الشكل الشبه نهائي .. مره كيوووت ،

×

سو .. بعد ما خلصنا وكذا .. كملنا شغل وكل شي ، وكل شوي وحده تنفقع بوجهنا وكذا .. يعني بالمختصر حتى الجدار ما سلم ،

فـ بعدين الشوكولاته قربت تخلص .. ونبي نسوي بعد وكذا ، فـ بنت عمي قالت لي انها تذوب جالكسي بالمايكروييف دايماً ،
وانا عاد قلت اوكي خلاص بجرب طريقتك دامها اسهل واسرع يعني ..
وجيت بكل حمااس حطيت الجالكسي فوق الشوكولاته الباقية وحطيتهم بالمايكروويف دقيقة كاملة !

وبعدين لما طلعتها .. فجأه اسمع صوت [ كوووش كوووش ] < صوت الحرق هذاك ههههههههههه ..
وعاد أول ما شفت الشوكولا كيف قلبت سودا وكذا .. فجأه صرخت [ كوكييييز ! ] ..
وبنت عمي خلاص فطسست ضحك علي ههههههه .. طبعاً انا تفشلت وسكت ،

< لا تضحكون ! .. انا وش عرفني انها تنحط بس 10 ثواني مدري 20 !

< الشكل النهـائي ، ترا الطعم رهيييب ..
هو اللي من جد يقهر اننا اشتغلنا 4 ساعات وما طلعنا إلا بـ 6 أكواب -___- !

×

عاد بعد سويت كوكيز .. بس خليني ساترة على نفسي ،
أكتفي بـ قول ماما لما شافتهم من بعيد قبل لا تدخل المطبخ قالت بنفسها [ وش عندهم مسويين همبرجر من الحين ! ] ..

ترا شكلهم مو مره مأساوي .. بس مدري صاروا مفلطحيين ..

وعاد لو تشوفون شكلي لما خلصتهم ، يووه بس أبي اناااامـ .. وتعابير وجهي زي هذا بجد [ ] < اسألوا روينـا بعد

~

.. أعتقد الحين لازم أعترف اني هبلة بس لسه تراني أبدع بالمطبخ !

C.U

D r e a m s +

’

’

آهــلاً ..
أمس شفت هالصورة اللي ذكرتني ببعض أحـلامي الطفولية ، أحـلامـ للحين اتمنى تتحقق !
فـ قررت اكتب بعض احلامي الطفولية هِنــا ،

- اممـ يومـ كنت صغيره كنت دايماً اتمنى لو أقدر اطير ! واروح بين الغيـومـ واقعد العب هنــاك ! لحالي انا وبس .. محد يدري عني ولا احد حاس فيني !

- ولا كـنت دائماً لمـا اتمرجح اتمنى اني أوصل للقمر ! .. من جد تخيلوا لو توصلون للقمر بالمراجيح .. يا لييت والله !

- كنت ولا زلت أتمنى لو أني طالبة في هوجورتس مع هاري بوتر وهيرميون ورون ! وأعيش مغامرات معهمـ واروح وأجي وأكون صديقة دراكو وبنفس الوقت صديقة لهاري .. وتكون عندي مهـارات عظيمة ولا دمبلدور ! < وطبعاً طبعاً لازمـ تكون عندي عبــاءة الإخفااء !

- يومـ كنت صغيره يعني من عمر 5 لين 8 سنـوات تقريباً .. كنت دايماً اتخيل أني ملكة الكارتون ! < ملكة بكل معنى الكلمه .. وكـانوا كل الشخصيـات الكارتونية تحت أمرتي ، بمـا فيهمـ كونـان -فارس أحلامي السـابق - وأذكر كنت اتخيل اني كنت اوقفه من تصوير الحلقـاات عشان يجي يلعب معي ويسليني ! / لا وتذكرون هذيك حقت [ صاحب الظل الطويل ] أذكر كنت بخيالاتي اسألها مين هو صاحب الظل الطويل ومدري أيش ههههههههـ ..

- امممـ تذكرون فيلمـ Charlie and the chocolate factory ، من بعد ما شفت هالفيـلم صرت طول الوقت أتمنى اني اروح مكــان كله حلويـات وأقدر آكل كل شيء ! آآآآآخخخ بس !

- أوكي من أغرب احلامـ طفولتي < أحس غريبه لأني طفلة وافكر بهالشي يعني xD !
كنت دايماً ابغى اسوق ! دايماً دايماً دايماً .. لدرجه كنت 24 ساعه أحلمـ اني خذت سيارة بابا وسقت وضيعت الطريق ولا عرفت أرجع البيت ههههههه .. والله كـانت حالتي صعبه !

- طبعـاً مين ما يعرف الجـاسوسـات ؟! .. أذكر يومـ كنت بخـامس كانت أمنية حيـاتي أصير جـاسوسة ! .. لا ومن كثر عشقنـا للجاسوسـات كنّـا انا وصديقاتي نقسمـ الشخصيات بيننا < عاد لو تشوفون الهوااش بس ! ههههههه .. أذكر انا وصديقتي اثنينـا نبي سَـامـ وآخر شي سوينـا قُرعة وهي خذت سـامـ ولين الحين متـأكده الموضوع فيه غش ! .. المهمـ وصل فينـا العشق اننـا كنّـا نجمع أي شي بالبيت ممكن يفيدنـا .. خيــوط كورات ألعــاب ، كل شي في الحيـاة وحتى كان عندي علبة حاطة فيها الأدوات وعندي شنطه فوشيه زيهمـ وكل شي في سبيل أني اصير أفضل جــاسوسة !

- وآخر شي .. واعتقد كل أحد لابد جا له يومـ فكّر بهالشي .. كنت دايماً أتمنى لو اقدر أقرا افكـار النـاس وأعرف كل شي عنهمـ وما يقدرون يخبـــون عني شي !

وبس .. وكمـا يقولون ألا يا ليتَ الشبـاب يعودُ يومــاً ! < اللي يسمعنـي يقول عجوووز xD !

.. شـاركوني أحـلامكمـ !

كيف تُسعد نفسك ؟! ؛

’

أثنـاء بحثي بين كُتب أميّ العزيزة ، وجدت كتيّب [ 2002 طريقة لتُسعد نفسك ! ]
  حقـاً ممتع ! ومُبهج جداً .. يساعدك على رؤية الحياة من منظور آخر ، فـ السعادة تُوجد في كل مكان !

؛

 ~  بعضٌ مما أعجبني ،

 - تحدث إلى نفسك إيجابياً ..
 - توقف عن مُحـاولات الوصول للكمـال ..
 - أعثر عن شيء في حيـاتك تشعر بالحمـاس تجاهه ..
 - ادع الله بما تُريد وأنت تصلي ..
 - إعثر على المرح والسعادة في مُتع الحياة البسيطة : سقوط المطر ، منظر النجوم ، الامواج على الشـاطئ ..
 - المعوقـات جزء طبيعي من الحياة ، فـ عندما تصطدم بعقبة بالطريق فأسلك ببساطة طريقاً آخر ..
 - ضع عطراً فواح الرائحة ..
 - حافظ دائماً على صلواتك وصلّ بخشوع ..
 - لا تهتم برأي الناس في الطريقة التي تدير فيها حياتك ..
 - أعلم انك وحدك من يملك حق اختيار الفكر الذي تتبناه في حياتك ..
 - أمزح مع شخص تحبه وتقاذف معه الاشياء حتى تشعر بالمرح وتتخلص من الشعور بالتوتر ..
 - تأمل صنع الله في أي مكان تذهب إليه ..
 - تخيل كأنك طائر تحلق بعيداً عن مشاكلك ..
 - توقف عن الشك في قدراتك ..
 - الزم هؤلاء الذين يشجعونك ويرفعون من معنوياتك ..
 - استمع إلى الحكمة والروعة من خلال الاغاني البسيطة في أفلام والت ديزني..
 - تصرف على سجيتك مع كل شخص تتعامل معه يومياً ..
 - أنظر إلى الزهرة وليس إلى الشوك ..
 - حدد يوماً في منتصف الاسبوع تقوم فيه بعمل خيري ..
 - قم برسم بعض الرسومات العابثة من أجل التسلية ..
 - قم بمكالمة هاتفية غير متوقعة لشخصٍ ما تحبه ..
 
 ~  وأجمل ما فيه الأقتبـاسات الإيجـابية بين السطـور ، مثل :
 
- إنه لرجل حكيم هذا الذي لا يحزن على تلك الاشياء التي لا يملكها وإنما يفرح لما بين يديه بالفعل ..
 - إن اسعد الناس هم من يفكرون في اكثر الأفكـار مُتعة ..
 - أن الحياة ليست بالصعوبة التي تتخيلها فبإمكانك أن تجعلها أسهل اذا احسنت فهمها ..
 - كنت بلا حِذاء وكنت دائم الشكوى من ذلك ، حتى قابلت شخصاً بلا قدمين ..
 - هُنـاك مكـان بداخلي أعيش فيه وحدي ، وفي هذا المكان تتجدد ينابيع المشاعر بداخلي ولا تجف أبداً ..
 - في بعض الاحيـان تكون الخسارة أفضل مكسب ..
 - إن خيبة الأمل تفعل بالنفس ما تفعله العاصفة الرعدية بالهواء ..
 - طريق الألف ميل يبدأ بخطوة ..
 - يجب على المرء أن يحب الناس من حوله وأن يثق بهم وإلا ستتأزم حياته ..
 - من الصعب أن تجعل إنساناً يشعر بالتعاسة بينما هو يشعر بقيمة نفسه ويشعر أن الله الذي خلقه قريباً منه ..
 
عذراً على الإطالة ، لكني استمتعت به كثيراً ولم أقدر على إختصاره =$

مهرجـان العلوم والتقنية الثاني بـ سايتك ؛

’

مهرجـآن العلوم والتقنية الثاني ♥ !
.. كان معرض رائع ، فكرته جداً خطيره واللي اعجبني اكثر ان اغلب المتطوعين طلاب جامعات ♥ ،
طبعاً انا كنت رايحه لهذا المهرجان السنه اللي فاتت ، بس ما كان بهالمُتعة ، يعني هالسنه المهرجان عليه إقبال أكثر ..
يعني شي حلو انك تشوف أطفـال اعمارهمـ أقل من 10 سنوات يعملون نمـاذج ولو كـانت بسيطه نسبياً لـ طائرات وروبوتات وجسور وغيرها ،
من جد أمس لما رحت له فرحت كثير لما شفت ان في نـاس كثير مهتمه ،

وأنصح صراحه كل أحد يروح له ♥ .. لأنه بجد ما يتفوت !
يعني أمس مثلاً استفدت من محـاضره النانو <" ..
وكان بعد فيه المرصد الفلكي ! يا الله كان شي خطيير ! لا تفوتونه ابد ! خصوصاً انه الحين بأمكانكم تشوفون كوكب زُحل "سيد الخواتمـ" ♥ !
وفي ورشـات عمل للصغـار من عمر 8 سنوات إلى 15 سنه ، هالورشـات فيها قسمين : قسمـ لـبرمجة الروبوت وقسمـ لـ عمل نموذج للرافعة المقصيّة .. بالنسبة لي دخلت حق الرافعة المقصيّة لأني مو مجربتها من قبل والروبوت انا مسويته قبل كذا ^^
كـان شي جداً ممتع ، يعني امس من جد استفدت كثير وتعلمت اشياء كثيره .. خصوصاً عن الاحتباس الحراري وكذا ،

الشي السلبي اللي شفته هناك وجود شباب قمة التخلف ! ، يعني انا اول ما شفتهمـ وانهم اصلاً جايين تطوعاً قلت ما شاء الله عليهمـ شكلهمـ ناس واعيين وكذا .. لكن من جد طاحوا من عيني لما صار يصرخ واحد منهمـ بـ عبارات مال امها داعي ! يعني خيير وين قااعدين ؟! هذا مركز علمي راقي ! والمشكله محد قال له شي ! .. من جد انقهرت وتحطمت وحسيت هالاشكال ما تستاهل انها تتواجد بكذا مكـان ابد ! .. لكن الحمدلله غطـوا عليه الموجوديين ♥ ،

عمومـاً هذي صور من المهرجـآن ♥ ،

< روبوت أخوي وولد خالتي ،

< مجسمـات الأطفال ♥ ،

< اعمال فنية معروضة بالمعرض ، عند قسم الأطفال ^^

واليومـ ان شاء الله بروح واحاول اصور لكمـ أكثر ، وبصور لكمـ الحوامة .. اللي للحين ما ادري وش هي ، بس يُـقال زي العوامه بس تمشي على اليابس والماء xD ..

اللهُم إرزقني بالـ لا مُبـالاة ؛ فـ حمـاقةُ غيري لا تُحتَـمل .. !

.. قمة التحطيم ! ؛

’

- رسمـياً فقدت الأمل بهذا الجيل ! ، من جد يعني تحطمت بشكل !

بـداية بـ لما أعلنت اني خلاص ناوية ادخل ثانوية مطورة ونظـآم مقررات وكذا ، فجأه تقابلك صيـحات ونظرات تشكك وإستحـقار !
طيب أوكي مو مشكله ، شككوا فيني وبـ قدراتي .. آهم شي انا عارفة نفسي وعارفة قدراتي وما همني آحد ..
ولا آهم شي يقولون : ” اصلاً صعبه ! ما راح تمشين فيها ! .. إدخلي أهلية احسن لك ” ..
طيب ابي افهمـ لو ما مشيتي فيها الحين ، بالجـامعة وش بتسوين بالضبط ؟!

بس يعني اللي حطمني أكثر شي ، إننـا قاعدين نفهمهـا أن هالنظـام مو بس راح يفيدها دراسيـاً ..
لا بالعكس راح يتطور تفكيرك وشخصيــتك ويطورك من نوآحي عدة ..
هنـا تجيك الصدمة الكبرى ، إنها ترد عليك بكل بساطة : ” طيب مين قال إني ابغى اطور نفسي ؟! ، انا مـا أبغى اطور نفسي ”
وتضحك المشكله ! .. ابي افهم تضحك على أيش ؟ تضحك على خيبتها ؟ تضحك على جهلها ؟ تضحك على نفسها ؟! ..
يعني ما في إنســان ما يبغى يطور من نفسه ! مستحيل في إنسان يبي يظل على حاله وما يبغى يصحح أخطاءه ويتطور للأفضل ،

واللي قهرني أكثر .. إننـا رجعنـا ننـاقشها ونقول لها يختي ما في إنســان ما يبي يتطور .. إلخ ، وهي لسه ترد علينـا بنفس الردود اللي تدل على قدر كبير من الجهل للأسف ..
وفجـأه البنت اللي قدامي تستغفلني وتلف عليهـا وتعطيها نظرة بـ معنى ” إسكتي لا تنـاقشيهمـ .. ما في فايدة من النـقاش ” !

افف يا ربي ! ، يعني لا يبون يتطورون ولا يبوننـا نتطور !؟ ..
طيب وبعدين يعني ؟ لـ متى راح نظل على هالجهـل والتخلف !

.. حقـاً من هيَ أنـا ؟ ؛

’

- حالياً بدأت اتسـاءل من أنا ؟ ما هدفي ؟ طموحي ؟ موقعي بالحياة ؟ مبتغاي ؟
اصلاً بديت آحس إني مو دلال ، إني انســانه ثانية .. ولما أخترت لالاد كـ لقب لي ، حسيت اني مو بس عكست اسمي .. اصلاً عكست حيـاتي كلهـا تقريباً !
يعني حيــاتي اختلفت كثير ، انـا تغيرت .. ما صرت دلال ، ما صارت تميزني بسـاطتي وإبداعي وسرعة بديهتي ، صار فيني تبلد !

.. أحيـاناً ألــومـ المجتمع اللي عـايشه فيه على هالتبلد .. بس احياناً أقول المجتمع وش دخله فيني ؟
هذي حيــاتي وانا حُـره فيها ولو أبي اتطور ولو أبي اتميّــز ، كـان بكل بســاطة قدرت .. لكن للأسف تأثرت بهالمجتمع وما صار يهمني شي ،

.. لكن بكل صراحة أخـاف ، انا اخـاف اني اكون على طبيعتي – لأول مره أعترف بهالشي على المَلأ ! – أحس المجتمع ما راح يتقبلني كـ دلال !
ما راح يتقبل هدوئي وجنوني ، مزحي وجدي ، فلسفتي وصمتي ..
المجتمع آحسه يفرض علي إني اخفي اجزاء من شخصيتي ، دائماً أخفي جدي وهدوئي وفلسفتي ..
المجتمع مو راضي يتقبل التنوع ، مو راضي يتقبل انه النـاس مختلفين .. يبون الكل يكون سطحي ، يبوننـا طول وقتنا مزح وهبــال .. ما في تطور ولا غيره ، وبعدين يقولون ليش احنا كذا وليش احنا كذا ! ><"

.. آآآخخ يا ربي صبـرني !
ويـا رب تعدي هالمرحلة على خير ، يقولون هذي المرآهقــة ! =/

.. ♥

مرحـبا ،

.. بدآيتي كـانت هنا قبل سنه تقريباً ، وبعدهـا انقطعت عن هالمدونة
تقريباً مليــت وما كان عندي شي اقدمه لـكم ، بس الحين تعلمت كثير ورجعت معي كثير ..
بـ سنه وحدة حسيت اني كبرت 5 سنين على الأقل ، تعلمت دروس كثيرة بالحيـاة ، تجــارب عظيمة ، وذكريـات أعظمـ ..
وهُــنا سيكون مـلاذي لـأُفـرغ ما لديّ ..

لـذا ؛ آهلاً بكمـ ♥ ~